"Блэкаут" сабабларини ўрганиш учун Бош вазир қошида Махсус комиссия тузиш қарори танқид қилинмоқда
Жумладан, Телеграм тармоғидаги @tentakminds "Комиссия тузилган бўлса, Энергетика вазирлиги бизга нимага керак?" деган саволни ўртага ташлади.
Ҳозирга қадар Бош вазир қошида тузилган ва ҳануз ишлаб турган Коронавирусга қарши курашни муовиқлаштирувчи Махсус коммисия ҳамда унга берилган чексиз ваколатлар баҳсларга сабаб бўлиб келмоқда.
Бундай комиссияларга, одатан президент топшириғи билан жуда кенг кўламдаги, мавжуд қонунчиликка мос келмаган ваколатлар берилади.
Натижада, комиссия қарорлари ортидан юзага келган салбий оқибатлар ва молиявий зарар учун жавобгарлик масаласи ҳам, худди COVID-19 пандемиясига қарши йўналтирилган ва талон-тарож қилинган маблағлар масаласида бўлгани каби, расман очиқ қолиши танқид қилинади.
Тошкент, Навоий, Фарғона ва Қорақалпоғистонда электр станциялари иши тиклангани маълум қилинди
"Ҳозирги вақтда Тошкент вилоятидаги Чорвоқ, Ходжикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланди. Айни пайтда республикамиз ҳудудларида электр энергияси таъминоти босқичма-босқич тикланмоқда", деб хабар қилди Энергетика вазирлиги.
Президент топшириғи билан энергетик коллапс сабабларини ўрганиши учун Махсус комиссия тузилди
Ўзбекистон Энергетика вазирлигининг хабар қилишича, Бош вазир ҳузуридаги ҳукумат комиссияси олдига "генерация жараёнини тиклаш ҳамда юқори ва паст кучланишли электр тармоқларига кучланиш бериш орқали истеъмолчиларнинг электр таъминотини тиклаш вазифаси" қўйилган.
Қирғизистон Марказий Осиё ягона электр тармоғидан чиқиб, ўз ҳудудига электр қуввати бера бошлади
Қирғизистон Марказий Осиё ягона электр тармоғидан чиқиб, ўз ҳудудига электр қуввати бера бошлади. Энергетика вазирлиги матбуот котиби Жийде Зоотбекова Чуй ва Жалолобод вилоятларига электр берила бошланганини, пойтахт Бишкекнинг бир қисмида электр таъминоти қайта тикланганини билдирди.
Аввалроқ Вазирлар Маҳкамаси раиси ўринбосари Эдил Байсалов бир ярим соат ичида Бишкекда, кейин бошқа вилоятларда электр таъминоти тикланиши тўғрисида Твиттер саҳифасида ёзган эди. Унга кўра, Марказий Осиё ягона электр тармоғидаги авария Қирғизистон ҳудудида содир бўлмаган.
Энергетика вазирлиги Қирғизистон ҳудудидаги иссиқлик ва гидроэлектр станцияларида авария бўлмаганини расман билдирди.
25 январь куни Бишкек вақти билан соат 12 ларда, Тошкент вақти билан соат 11 ларда Марказий Осиё ягона электр тармоғидаги носозлик оқибатида Ўзбекистон, Қирғизистон ва Қозоғистон электр энергияси таъминотидан узилиб қолди.