Ўзбекистон Европа Иттифоқига GSP+ имтиёзли режими амал қилиш муддатини яна 10 йилга узайтиришни сўради.

Инвестициялар, саноат ва савдо вазирлиги матбуот хизмати ахборотига кўра, бу таклиф Брюсселда бўлиб ўтган ЕИнинг имтиёзлар тизимини амалга ошириш масалалари бўйича ишчи гуруҳ йиғилишида билдирилган.

Йиғилишда Ўзбекистон делегацияси мамлакат 2021 йилда GSP+ бенефициар мақомини олганидан буён амалга оширган ишлар натижаларини тақдим этган.

Қайд этилишича, ушбу давр мобайнида ЕИга экспорт қарийб уч бараварга ошиб, 1,15 миллиард долларга етган. Шунингдек, 6200 дан ортиқ имтиёзли товар туридан 1100 га яқин маҳсулот, хусусан, қишлоқ хўжалиги маҳсулотлари, тўқимачилик, электротехника ва кимё маҳсулотлари учун барқарор экспорт йўлга қўйилган.

Ўзбек делегацияси GSP+ доирасида имтиёзли товарлар рўйхатини мева ва сабзавотлар билан кенгайтириш, шунингдек, мавсумий экспорт квоталарини қайта кўриб чиқиб, уларнинг муддатини узайтириш сўровини ҳам илгари сурган.

GSP+ бу – ЕИнинг барқарор ривожланиш ва самарали бошқарув бўйича махсус преференциялар тизимидир. Мазкур тизим ривожланаётган давлатларда барқарор тараққиётга ёрдам бериш ва камбағалликни камайтириш мақсадида уларнинг маҳсулотларини Европа бозорига киришини енгиллаштириш мақсадида ишлаб чиқилган.

Озодлик Ўзбекистон 2021 йил 10 апрелидан эътиборан GSP+ иштирокчиси сифатида 6200 турдаги маҳсулотни ЕИ ҳудудига божсиз экспорт қилиш имкониятига эга бўлгани ҳақида хабар қилган эди.

Брюссель 2023 йил ноябрь ойида Ўзбекистон учун GSP+ тизимидан фойдаланиш муддатини 2027 йил 31 декабрга қадар узайтирган.

Президент Шавкат Мирзиёев 2023 йилда мамлакатнинг Европага саноат экспортини 600 та маҳсулотга, экспорт ҳажмини эса 700 миллион долларга етказиш вазифасини қўйганди. Ўшанда Мирзиёев мамлакат GSP+ тизимига кирадиган 6200 та божсиз маҳсулотнинг бор-йўғи 325 турини экспорт қилаётганидан кўнгли тўлмаётганини билдирган эди.

“Миллий тикланиш” партияси раиси Алишер Қодиров россиялик сиёсатчиларнинг Марказий Осиё, хусусан, Ўзбекистон билан виза тартибини жорий этиш борасидаги таклифларини қўллаб-қувватлашини маълум қилди.

“Яқин келажакда кутилаётган беқарорлик, релокантларни жиддий ортиши эҳтимоллари фонида нафақат биз, бутун Марказий Осиё минтақасини Россия билан виза орқали кириш-чиқиш қилиш, иш излаб бораётганларга талаблар ва назоратни кучайтириш ҳақидаги рус сиёсатчиларининг ташаббусларни қўллаб-қувватлашимиз керак”, деб ёзди у Телеграмдаги расмий саҳифасида.

Қодировга кўра, Ўзбекистонда яшайдиган барча фуқаролар ўзбек тили, маданияти ва маҳаллий қадриятларни билиши ва ҳурмат қилиши шарт бўлгани каби хорижга иш излаб бораётган ватандошлар ҳам маҳаллий тил, маданият, қонунлар ва қиладиган ишини яхши билиши зарур.

“Миллий тикланиш” партияси раиси таъбирича, виза тартибининг жорий этилиши билан ҳукумат “ҳақини ҳимоя қила олмайдиган, маҳаллий айирмакашлар томонидан камситилишга рози бўлаётган, энг ёмони, ихтиёрий-мажбурий, масъулиятсизларча ҳаётини сотиб юбориб Ўзбекистон учун жиддий ижтимоий, сиёсий, иқтисодий юк яратаётган айрим фуқароларга ҳам ёрдам берган бўлади”.

Алишер Қодировнинг виза режимига доир таклифи Россияда меҳнат муҳожирларига нисбатан қатор чекловлар жорий этилаётган паллада янграмоқда.

Аввалроқ Россия либерал-демократик партияси раҳбари Леонид Слуцкий меҳнат муҳожирларнинг иш ва яшаш тарзини тартибга солувчи Муҳожирлар кодексини ишлаб чиқиш ташаббуси билан чиққанди.

Бир муддат олдин Россия Давлат Думаси спикери Вячеслав Володин мигрантларнинг фарзандларини мактабга қабул қилишдан олдин улардан рус тили бўйича тест олишни таклиф қилган. Таҳлилчилар ушбу қоида янги коррупция схемаларини яратади ва россияликлар билан мигрантлар ўртасидаги жарликни янада кенгайтиради, деб ҳисоблашади.

“Миллий тикланиш” партияси лидери жорий йил сентябрь ойида Ўзбекистонда совет мафкураси, даври ва рамзларини тарғиб қилишни қонунчилик билан тақиқлаш ташаббусини илгари сурганди.

Экспертлар гоҳида баҳсли таклифларни илгари сурадиган, гоҳида жамоатчилик овози ўлароқ майдон чиқадиган Алишер Қодировни “Ўзбекистоннинг сокин сиёсий майдонида ғайриодатий шахс” деб баҳолашган.

Айни вақтда Суриядаги урушда қатнашиб, ижтимоий тармоқларда “Абу Валид” тахаллуси билан видеотасвирлар жойлаб бораётган ўзбекистонлик Худоёр Нуриддиновга нисбатан қидирув эълон қилинган. Бу ҳақда Ўзбекистон Ички ишлар вазирлиги маълумот тарқатди.

“Х. Нуриддинов 2016 йилда Россияга меҳнат муҳожири сифатида бориб, у ерда халқаро террористик ташкилотлар ғоялари таъсирига тушиб, Суриянинг Идлиб шаҳрига кетган. У ердан туриб олиб борган тарғибот ишлари оқибатида бир қанча юртдошларимиз жангларда иштирок этиб ҳалок бўлган. Айни вақтда Х. Нуриддинов ижтимоий тармоқлар ва YouTube видеохостинги орқали ўзининг жиноий қилмишларига диний тус бериб, жиҳодга чорловларни давом эттирмоқда”, дейилган ИИВ хабарномасида.

1994 йилда Фарғона вилояти Риштон туманида туғилган мазкур фуқарога нисбатан Ўзбекистон Жиноят кодексининг 155-2-моддаси (террорчилик фаолиятини амалга ошириш мақсадида ўқувдан ўтиш ёки ҳаракатланиш), 159-моддаси (Ўзбекистон Республикаси Конституциявий тузумига тажовуз қилиш), 223-моддаси (қонунга хилоф равишда чет элга чиқиш ёки Ўзбекистонга кириш) ва 244-2-моддаси (тақиқланган ташкилотлар тузиш ҳамда уларга раҳбарлик қилиш, иштирок этиш) билан жиноят иши қўзғатилган.

ИИВ у юритаётган саҳифалар Ўзбекистон ҳудудида тақиқлангани, уларни сақлаш, олиб юриш ва тарқатиш жиноий жавобгарликка сабаб бўлишидан огоҳлантирган.

Ўтган ҳафта ҳуқуқ идоралари Суриядаги қуролли ҳаракатларда иштирок этаётган бошқа бир Ўзбекистон фуқароси Давлат Тиллабердиевга нисбатан терроризм ва экстремизм бўйича жиноят иши очилганини билдирганди.

Ўзбекистонда қарийб бир миллиард сўмлик қалбаки пулларнинг муомалага киритилишининг олди олинган. Бу ҳақда Ўзбекистон Миллий ахборот агентлиги хабар қилди.

Ҳуқуқни муҳофаза қилувчи органлар томонидан ўтказилган тезкор тадбирда Фарғона вилоятида яшовчи уч нафар фуқаро ўзаро тил бириктириб, қалбаки 998 миллион 740 минг сўм пулни Жиззах вилоятида 27 минг 200 АҚШ долларига сотаётган вақтда ашёвий далиллар билан ушланган.

Терговга қадар текширувда мазкур шахслардан олинган 200, 100 ва 20 минг сўмлик қалбаки банкнотлар пуркагичли принтер ёрдамида чоп этилгани аниқланган.

1980, 1983 ва 1989 йилларда туғилган гумонланувчиларнинг икки нафари муқаддам судлангани айтилмоқда.

Ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 3-қисми “а” банди билан жиноят иши қўзғатилган ва уч фуқаро қамоққа олинган.

Озодлик ўтган йили ҳам Жиззах, Самарқанд ва Бухоро вилоятларида 462 миллион 400 минг сўмлик қалбаки пулларни тайёрлаб, муомалага киритганликда гумонланган олти киши қўлга олингани ҳақида хабар қилган эди.

Uzbekistan Airways авиаширкати талабалар учун барча маҳаллий авиақатновларнинг эконом тоифаси авиачипталари тарифига 50 фоизгача чегирма эълон қилди.

Авиаширкат матбуот хизмати қайдича, чегирма 2024 йил 23 декабридан 2025 йил 7 январига қадар амалга ошириладиган авиақатновлар учун амал қилади. Бу имкониятдан ўрта махсус, касб-ҳунар ва олий таълим бўйича давлат муассасалари талабалари фойдаланиши мумкин.

“50% гача чегирмали авиачиптани Тошкентдаги Uzbekistan Airways Sales филиалида, унинг агентларидан Ўзбекистон ҳудудида ва booking.uzairways.com сайтида харид қилишингиз мумкин. Йўловчи ташиш тарифларига қўшимча равишда турли солиқлар, йиғимлар ва тўловлар ҳам ўрнатилади. Уларга 50% гача тақдим этиладиган чегирма амал қилмайди”, дейилган ширкат хабарномасида.

Олий таълим, фан ва инновациялар вазирлигининг тегишли буйруғи билан олий таълим ташкилотлари талабалари, техникум, коллеж, касб-ҳунар мактаби ва академик лицейлар ўқувчиларига 2024 йил 25 декабридан 2025 йил 7 январига қадар қишки таътил эълон қилинган.

Uzdiplomat.uz сайти чегирма эълон қилинганидан кейин Uzbekistan Airways компанияси сайтида узилишлар юзага келгани, энг харидоргир йўналишларда чипта қолмаганига эътибор қаратган. “Доимгидек чегирма бор, лекин арзон чипта йўқ”, деб ёзган нашр.

“Ўзбекистон темир йўллари” АЖ ҳам 23 декабрдан 10 январга қадар барча маҳаллий йўналишдаги йўловчи поездлар (SV/VIP тоифа вагонлар ва юқори тезликда ҳаракатланувчи “Афросиёб” электропоездларидан ташқари) чипталари учун талабаларга 50 фоизлик чегирма таклиф қилган.

Ўзбекистонда истеъмол юқори бўлган ҳудудлардаги автомобилларга газ тўлдириш компрессор шохобчалари (газ заправкалар) фаолиятига қисқа муддатли чеклов киритилади.

Энергетика вазирлиги чеклов жорий этилишини “ҳаво ҳароратининг кескин пасайиши натижасида истеъмолчиларнинг табиий газга бўлган талаби кескин ортгани” ва “аҳоли хонадонлари ҳамда ижтимоий соҳа объектларини табиий газ билан таъминлаш устувор вазифа” экани билан асослаган.

Ижтимоий тармоқларда вазирлик баёноти ёйинлангунга қадар ҳам айрим ҳудудларда газ тўлдириш шохобчалари фаолияти тўхтатилгани ҳақида хабарлар тарқалганди.

Вазирликнинг тан олишича, республика газ транспорт тизими объектлари максимал қувватларда ишлашига, ерости сақлаш омборларидан режалаштирилган максимал кунлик газ олинишига ва тармоққа узатилишига қарамай, қувурларда газ босимининг пасайиши кузатилмоқда.

Чекловлар маҳаллий ҳокимликлар билан биргаликда ишлаб чиқилган режа-графикларга мувофиқ жорий этилиши, бу бўйича вилоятлар ва туманлар ҳокимликлари расмий ахборот манбаларида маълумот бериб борилиши маълум қилинган.

Ўзбекистонда ҳаво ҳарорати пасайган кунларда газ тўлдириш шохобчалари фаолияти чекланиши анъанага айланган. Аммо жорий йил ноябрь ойида Энергетика вазири Жўрабек Мирзамаҳмудов ҳарорат -10, -20 даражагача пасайган тақдирда ҳам аҳоли ва иқтисодиётни энергия билан таъминлаш бўйича ҳаракатлар режаси ҳозирланганини маълум қилган эди.

Аввалроқ эса вазир “Газли” ва “Хўжаобод” ерости газ омборларида бу йилги қиш мавсуми учун ўтган йилга нисбатан 1,1 миллиард куб метр кўпроқ – 5,1 миллиард куб метрдан ортиқ газ захираси жамланганини айтганди.

Узлуксиз таъминот ҳақидаги ваъдаларга қарамай, ҳали ҳаво ҳарорати манфий даражага тушмаган кунлардаёқ пойтахтдаги ишлаб чиқариш корхоналарини газдан узиш бошланган.

Тошкент вилояти ҳудудида қурилаётган Янги Тошкент туманида Санкт-Петербург мавзеси ҳам барпо этилади, дея маълум қилди Россиянинг Ўзбекистондаги савдо-тижорат ваколатхонаси.

Ўзбекистон ва Россия ваколатли идоралари имзолаган меморандумга мувофиқ, янги кварталнинг архитектура лойиҳасини санкт-петербурглик мутахассислар ишлаб чиқади.

Qalampir.uz нашри жорий йил 26-27 май кунлари бўлиб ўтган Россия ва Ўзбекистон расмийлари учрашувида президент Шавкат Мирзиёев Янги Тошкент кўчаларидан бирини Санкт-Петербург шарафига номлашни таклиф этганини эслатган.

Янги Тошкент пойтахтнинг жануби-шарқида, Тошкент вилоятининг Юқори Чирчиқ ва Ўрта Чирчиқ туманларига тегишли ҳудудда қурилмоқда. Туманнинг биринчи яшаш ва инфратузилма объектларини қуриш ишлари жорий йил апрель ойида бошланган. Асосий объектлар қурилишини 2045 йилда якунлаш режалаштирилган.

Озодлик аввалроқ пойтахтдаги ижроия ҳокимияти органлари 20 минг гектарни эгаллайдиган Янги Тошкент тумани ҳудудига кўчирилиши режалаштирилаётгани ҳақида хабар қилганди.

Ўзбекистонлик аёл Таиланднинг Паттайя шаҳридаги меҳмонхона олтинчи қаватидан тушиб кетди.

“The Pattaya News” нашрининг маҳаллий полиция маълумотига таянган ҳолда хабар қилишича, қутқарув хизмати 7 декабрь куни соат 12:30 да Паттайя жанубидаги меҳмонхона балконидан чет эллик аёл тушиб кетгани ҳақида хабар олган.

Воқеа жойига етиб борган қутқарувчилар биринчи тиббий ёрдам кўрсатиб, аёлни зудлик билан маҳаллий шифохонага ётқизганлар.

25 ёшли ўзбекистонлик аёл ҳодиса оқибатида оғир жароҳатлангани айтилмоқда.

Паттайя полицияси жабрланувчи меҳмонхонанинг 6-қаватида икки дўсти билан турганини аниқлаган. Миршаблар аёлнинг ҳамхоналарини сўроқ қилмоқчи бўлган, бироқ иккаласи ҳам маст ҳолатда бўлгани сабаб вазиятга аниқлик киритишнинг имкони бўлмаган.

Ҳодиса юзасидан суриштирув давом этаётгани билдирилган.

Маълумот ўрнида: фожиа рўй берган Паттайя шаҳри Таиланднинг жануби-шарқида жойлашган бўлиб, у сайёҳлар серқатнов курорт манзиллар сирасига киради.

Озодлик аввалроқ Тошкент шаҳридаги “Чорсу” меҳмонхонаси харобасининг юқори қаватига чиққан ўсмир у ердан тушиб кетиб нобуд бўлгани ҳақида хабар қилган эди.

Фарғона вилоятининг Бувайда, Риштон, Фарғона туманлари ва Марғилон шаҳрида қорамоллар тери тошмаси касаллигидан қирилиб кетяпти.

Ҳолат юзасидан суриштирув ўтказган Kun.uz нашри касаллик айниқса Риштон туманида кенг ёйилгани, айрим хонадонларда икки-учтадан мол нобуд бўлганини аниқлаган.

“Молларнинг оёғи шишиб чўлоқлана бошлади, кейин докторга даволатдик, иложи бўлмади. Дори-дармонга ҳам икки-уч миллион пул сарфладик. Бу касалликдан даво топган мол ҳақида аниқ эшитмадим. Кўп моллар ўлиб кетяпти”, деган икки қорамолидан айрилган фарғоналик Алишер Абдумуталов.

Қайд этилишича, касаллик тарқалган ҳудудлар аҳолиси мол гўшти сотиб олишдан ҳам қўрқмоқда.

Риштон тумани ветеринария бўлими ходими Аъзамжон Янгибоевга кўра, чорва молларида кузатилаётган бу хасталик нодуляр дерматит деб аталади. Вирус Хитойдан кириб келган деб тахмин қилинмоқда.

Ушбу тери-таносил касаллигининг инсонга юқиши исботланмаганини қайд этган мутахассис аҳолини фақат ветеринария назоратидан ўтказилган гўштни истеъмол қилишга ундаган.

Ветеринария масъули нодуляр дерматит касаллигининг олдини олиш мақсадида хонадонлардаги қорамол ва қўйларни эмлаш ишлари олиб борилаётганини айтган.

Kun.uz мухбири билан суҳбатлашган фарғоналиклар давлат идораларидан ушбу чорва касаллигига қарши курашни кучайтиришни сўраган.

Ўзбекистонда иситиш ва иссиқ сув таъминоти тарифлари 2025 йил давомида икки марта оширилиши мумкин. Бу ҳақда Қурилиш ва уй-жой коммунал хўжалиги вазирлиги Иссиқлик таъминоти тизимларидан фойдаланиш ва ривожлантириш бошқармаси бошлиғи Илҳом Тўраев маълум қилган.

“Жорий йилда ҳудудларда нархлар бир марта ошган бўлса, келгуси йилда икки марта ошади. Гап [зарарларни] қоплаш учун давлат субсидияларига бориб тақалади. Иссиқлик таъминотида давлат субсидияларининг улуши жуда катта. Шу муносабат билан биз тизимни янгилаш ва яхши шароит яратиш учун нархларни қайта кўриб чиқишимиз керак ва бунинг учун маблағ керак”, дея иқтибос келтирган Илҳом Тўраев сўзларидан Gazeta.uz нашри.

Мулозимга кўра, келгуси йилда электр энергияси ва табиий газ қимматлаши сабаб иситиш ва иссиқ сув тарифлари 15 фоиздан икки марта ошиши прогноз қилинмоқда.

Озодлик Ўзбекистон пойтахтида 31 октябрдан эътиборан аҳоли ва юридик шахслар учун иссиқлик таъминоти ва иссиқ сув хизматлари тарифлари 15 фоизга оширилгани ҳақида хабар қилган эди.

Пойтахтда марказлашган иссиқлик таъминоти хизмати кўрсатувчи “Veolia Energy Tashkent” МЧЖга кўра, шаҳар аҳолиси асосий тарифнинг 14 фоизини тўлайди, қолган қисми эса шаҳар бюджетидан субсидия сифатида қопланади.

2025-2027 йиллар учун Бюджетнома лойиҳасида аҳолига пасайтирилган нархларда иссиқлик етказиб беришдаги зарарни қоплаш учун ғазнадан 4,2 триллион сўм субсидия ажратилиши белгиланган. Шу мақсадда 2023 йилда 1,6 триллион сўм сарфланган бўлса, жорий йилда мазкур кўрсаткич 1,97 триллион сўмга етган.

Эслатиб ўтамиз, Тошкент шаҳрида иссиқлик таъминоти нархи 2024 йилнинг 2 апрелида ҳам 15 фоизга оширилганди.

Ўзбекистонда Умра тадбирларини ноқонуний ташкил этаётган туроператорлар жавобгарликка тортилмоқда. Бу ҳақда Daryo.uz нашри Дин ишлари бўйича қўмитадан олинган маълумотга таянган ҳолда хабар қилди.

Ўзбекистон ва Тожикистоннинг юзга яқин фуқароси қўмитага Саудия Арабистонининг Макка шаҳридаги меҳмонхонадан чиқариб юборилгани ҳамда қайтиш авиачипталарисиз қолиб кетгани ҳақида мурожаат қилган.

Маълум бўлишича, зиёратчилар тегишли лицензиясиз, ноқонуний фаолият олиб бораётган Yusro Tour, Мuslim Travel, Меtа Travel ҳамда Elchi Travel туроператорлари орқали муқаддас зиёратга борган. Ҳолат ўрганилганда, турфирмалар томонидан меҳмонхона пуллари тўланмагани аниқланган.

Саудия Арабистонида қолиб кетган фуқаролар қайтарилган ва Умра тадбирларини ноқонуний ташкил этган фирмаларга нисбатан Жиноят кодексининг 168-моддаси (фирибгарлик) билан жиноят иши қўзғатилган.

Дин ишлари бўйича қўмита жорий йил 21 ноябрь куни Умра тадбирларини ташкил этиш ва ўтказиш фаолиятини амалга оширишга ҳақли бўлган 12 та сайёҳлик фирмаси номини эълон қилганди.

Вазирлар Маҳкамаси жорий йил 12 октябрь куни “Умра тадбирларини ташкил этиш ва ўтказиш билан боғлиқ чора-тадбирларни янада такомиллаштириш тўғрисида”ги 668-сонли қарор қабул қилиши ортидан Умра лицензияси талаблари кучайтирилган.

Расмийлар лицензия талаблари кучайтирилишини турфирмалар айби билан бир неча минг ватандош Саудия Арабистонида сарсон бўлгани билан изоҳлаган.

Жамоатчилик эса лицензия шартлари янада қийинлашиши ортидан Умра монополияси қайтиши мумкинлигидан хавотир билдирган.

Ўзбекистон президенти Шавкат Мирзиёев мамлакат Ташқи ишлар вазирлигига Буюк Британия, Германия, Канада, Словакия, Австралия, Янги Зеландия каби мамлакатларда ўқиш, малака ошириш ҳамда замонавий корхоналарда ишлаш истагида бўлган фуқароларга енгиллик бўлиши учун виза тартибини соддалаштириш бўйича зарур чоралар кўришни топширди.

Президент матбуот хизмати маълумотига мувофиқ, 7 декабрь куни бўлиб ўтган йиғилишда аҳолини талаб юқори касбларга ўқитиш ва даромадли иш билан таъминлаш масалалари муҳокама қилинган.

Бундан ташқари, келгуси йилдан ривожланган давлатларда ҳам ишлаш, ҳам ўқиш имконини берувчи “Work and Travel” каби дастурларда қатнашаётган ўзбекистонлик ёшларга йўлкира харажатлари учун ссуда ажратишни йўлга қўйиш вазифаси белгиланган.

Шу билан бирга, чет элда меҳнат қилаётган ватандошлар билан мулоқотни кучайтириш, уларнинг кўпроқ ойлик олишига шароит яратиш ҳамда ижтимоий ва ҳуқуқий қўллаб-қувватлаш лозимлиги қайд этилган.

Озодлик декабрь ойи бошида Ўзбекистон ва Хитой ташқи ишлар вазирлари ўзаро визадан озод қилиш тўғрисида ҳукуматлараро битимни имзолагани ҳақида хабар қилганди.

Битимга мувофиқ, Ўзбекистон ва Хитой фуқаролари икки давлат ҳудудларига кириш, ундан чиқиш ёки транзит қилиш учун 30 кунгача муддатга виза талабларидан озод қилинади.

Германия ҳам ўзбекистонликлар учун ишчи визасини бериш тартибини енгиллаштириш истагини билдирган.

Айни пайтда экспертлар Буюк Британия каби марказий осиёликлар орасида меҳнат миграцияси учун машҳур манзилларда виза, иш ва даромад борасида алдов ва фириб қурбони бўлиш хатари кучли эканини ҳам эътибордан соқит қилмаслик керак, деб ҳисоблайди.

Ўзбекистонда жиноий уюшма ташкил этиш дохил оғир жиноятларда айбдор деб топилган Саидазиз Саидалиевга нисбатан яна бир жиноят бўйича ҳукм ўқилгани маълум бўлди.

Kun.uz нашри хабарига кўра, жиноят ишлари бўйича Юнусобод тумани судининг жорий йил 29 октябридаги ҳукмига мувофиқ жамоатчиликка “Саидазиз медгородок” лақаби билан танилган фуқаро Саидазиз Саидалиев Жиноят кодексининг 165-моддасида (товламачилик) кўзда тутилган жиноятнинг яна бир эпизодида айбдор деб топилган.

Суд ҳужжатида баён қилинишича, Саидазиз Саидалиев Илҳом Сотволдиев ва терговда аниқлашнинг имкони бўлмаган бошқа шахслар билан жиноий тил бириктириб, 2023 йил январь ойида Яшнобод туманидаги уйлардан бирига бориб, тадбиркор Бахтиёр Колоновга собиқ шеригидан гўё 700 минг доллар қарздор эканини айтишган.

Тадбиркор уларга қаршилик кўрсатганида “Саидазим медгородок” ва шериги пичоқ ҳамда тўппончадан фойдаланган ҳолда, пулни қайтармаса, оиласига жиддий зарар етказиб, ўзини отиб ташлашни айтиб таҳдид қилишган.

Суд мажлисида Саидалиев ва Сотволдиев айбига иқрор бўлмаган.

Ҳукмга кўра, Саидалиев жиноят ишлари бўйича Юнусобод туман судининг 2024 йил 5 августидаги ҳукми билан тайинланган жазонинг ўталган қисмини қисман қўшган ҳолда узил-кесил 20 йил 6 ой, Сотволдиев эса узил-кесил 5 йил 3 ой муддатга озодликдан маҳрум қилинган.

Озодлик аввалроқ “Саидазиз медгородок”ка 20 йиллик қамоқ жазоси тайинлангани ҳақида хабар қилган.

“Кўча”га алоқадор деб кўрилган Саидалиев ЖКнинг 165 (товламачилик), 168 (фирибгарлик), 242 (жиноий уюшма ташкил этиш), 243 (жиноий фаолиятдан олинган даромадларни легаллаштириш), 211−28 (пора беришга шериклик қилиш), 277 (безорилик) каби моддаларида айбдор деб топилган.

Жиноят ишлари бўйича Тошкент шаҳри судининг апелляция инстанцияси жорий йил 27 ноябрь куни бўлиб ўтган йиғилишида унга нисбатан чиқарилган ҳукмни ўзгаришсиз қолдирганди.

Ўзбекистонда анъанага мувофиқ 8 декабрь – Конституция куни муносабати билан маҳкумларнинг бир гуруҳи афв этилди.

Президент Шавкат Мирзиёев имзолаган “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонга мувофиқ, афв ҳуқуқидан 483 нафар шахс фойдаланмоқда.

Ушбу рўйхатга киритилган шахсларнинг 107 нафари жазодан тўлиқ озод бўлади, 275 нафари жазони ўташдан муддатидан илгари шартли озод қилинади, 7 нафарига тайинланган жазо енгилроғига алмаштирилади, 94 нафар шахсга эса тайинланган озодликдан маҳрум этиш жазосининг муддати қисқартирилади.

Афв этилганларнинг 25 нафарини чет эл фуқаролари, 32 нафарини аёл, 5 нафарини 60 ёшдан ошган эркаклар, 274 нафарини ёшлар (жумладан, 104 нафар вояга етмаганлар) ҳамда 6 нафарини тақиқланган ташкилотлар фаолиятида қатнашган шахслар ташкил этади.

Қайд этилишича, фармон ижроси доирасида афв этилган шахсларни оиласи ва яқинлари бағрига қайтариш, ижтимоий ҳаётга мослашиб, фойдали меҳнат билан шуғулланишлари, соғлом турмуш тарзини йўлга қўйиб, жамиятда муносиб ўрин топишлари учун уларга кўмак бериш юзасидан масъул вазирлик ва идораларга тегишли топшириқлар берилган.

“Бу воқеа юртимизда олиб борилаётган инсонпарварлик сиёсатининг, халқимизга хос бағрикенглик, кечиримли бўлиш, олижаноблик ва меҳр-мурувват кўрсатиш каби эзгу фазилатларнинг намоён бўлганлигининг амалий ифодасидир”, дейилган фармон шарҳида.

Ўзбекистонда кенг кўламли афвнинг сўнггиси жорий йил 30 август куни Мустақилликнинг 33 йиллиги арафасида эълон қилинган эди. Унга мувофиқ, 522 нафар шахс афв этилган.

Ўтган йили Конституция куни арафасида эълон қилинган афвдан эса 334 маҳкум фойдаланганди.

Россияда фарзандини муттасил равишда қийнаб келганликда айбланган ўзбекистонлик аёл 4 йил муддатга озодликдан маҳрум қилинди.

Россия Федерацияси Тергов қўмитасининг Новосибирск шаҳри тергов бошқармаси ёйинлаган хабарномада судланувчи 2021 йилнинг июнь-август ойлари мобайнида 1,5 яшар қизига мунтазам равишда жисмоний ва руҳий азоб бергани қайд этилган.

Ўша йилнинг август ойида қизча вафот этган. Аёл эса тиббий муассасаларга мурожаат қилмай, уни ўзбошимчалик билан дафн қилган.

Аёл РФ Жиноят кодекси 117-моддаси (қийнаш) 2-қисми “г” бандида назарда тутилган жиноятни содир этишда айбдор деб топилган.

Ўзбекистон Республикаси Болалар омбудсмани мазкур жиноят иши юзасидан берган қўшимча маълумотга кўра, судланувчи Андижон вилояти Жалақудуқ туманида доимий рўйхатда турган А.Г. 2016 йилдан эътиборан РФнинг Новосибирск шаҳрида турмуш ўртоғи Б.И. билан яшаб келган.

2024 йил бошларида ижтимоий тармоқларда А.Г. 2019 йилда туғилган қизи Р.Х.ни шафқатсизларча ураётгани, кейинроқ эса гўдакнинг жасадини ерга кўмаётгани тасвирланган видео тарқалганди.

Маълум бўлишича, Россия тергов идоралари томонидан аёлга нисбатан жиноят иши Ўзбекистон Болалар омбудсмани сўрови асосида қўзғатилган.

Аввалроқ Ижтимоий ҳимоя миллий агентлиги Россияда ота-она қарамоғисиз мушкул вазиятга тушиб қолган ўнлаб ўзбекистонлик бола ватанига қайтарилганини маълум қилганди.