АҚШнинг аксарият штатларида, овоз бериш бошланди
Мамлакат вақти билан соат 9:00 ҳолатига кўра кўплаб штатларда сайлов участкалари очилган. Аризона, Аёва, Оклахома, Техас, Колорадо, Висконсин, Теннесси, Небраска, Арканзас, Ню-Мексико, Юта, Миссисипи, Миннесота, Монтана, Шимолий Дакота, Жанубий Дакота штатларида овоз бериш минтақавий вақт билан эрталаб соат 9:00 дан бошланган.
Алабама, Делавер, Колумбия округи, Флорида, Жоржия, Ню-Хемпшир, Иллинойс, Индиана, Канзас, Луизиана, Мериленд, Массачусетс, Мичиган, Миссури, Пенсилвания, Род-Айленд ва Ваёминг штатларида ҳам овоз бериш жараёни эрталаб бошланган ва ҳозирда давом этмоқда.
Калифорния ва Айдахода соат 10:00да ,Вашингтон ва Аляскада соат 11:00 да, Гавайида эса соат 12 дан овоз бериш жараёни бошланади.
Жоржия овоз бериш участкасида бомба таҳдиди
Жоржия штати Давлат котиби Бред Раффенспергер сайлов участкаларида бомба таҳдиди қайд этилгани, бу таҳдид "манбаи Россияга боғлиқ бўлиши мумкин"лиги ҳақида маълум қилди.
Раффенспергерга кўра, ҳозирча бу таҳдидни тасдиқловчи асослар йўқ, аммо расмийлари хавфсизликка оид ҳар қандай хабарни диққат билан текширмоқда. 4 ноябр куни Жоржиядаги сайлов участкаси ходими сайловчиларга бомбардимон билан таҳдид қилиб хат юборишда айбланиб, ушланган эди.
АҚШ Федерал қидирув бюроси (ФҚБ) бир неча штатда сайлов участкаларига бомба қўйиш таҳдидидан хабари борлиги ва буларнинг аксарияти, гўёки Россия электрон почта доменларига алоқадор кўрилаётганини билдирди. Аммо, ФҚБ ҳам ҳозирча ҳеч бир таҳдид огоҳлантириши ишончли бўлиб чиқмаганини таъкидлади.
Жоржия АҚШ президентлик сайлови натижасида ҳал қилувчи рол ўйнаши кутилган еттита штатдан биридир. Ҳозир АҚШ бўйлаб расмийлар сайлов пайти ва сайловдан кейин сиёсий зўравонликлар бўлиши эҳтимолига қарши эҳтиёт чоралари кучайтирилганини айтмоқда.
АҚШ прокурорлари америкаликларни зўравонликлардан тийилишга чақирди.
Трамп мағлуб бўлса, “биринчи бўлиб тан олиши”ни айтди
Республикачилардан номзод Доналд Трамп Флоридада овоз бериб бўлгач, журналистлар билан суҳбатда, жуда яхши сайловолди кампаниясини олиб борганига ишончи комил эканини айтди.
Трамп, агар сайловда ютқазса, биринчилардан бўлиб мағлубиятини тан олишини ҳам таъкидлади.
Демократлардан номзод Камала Харрис америкаликларни бирлашишга чақириб, Трампнинг иккинчи муддати Америка демократияси пойдеворига жиддий таҳдид, деб огоҳлантирди.
80 миллиондан ортиқ америкалик сайлов кунига қадар почта орқали ёки шахсан овоз берган.
Ўзбек иқтисодчилари АҚШ сайловлари ҳақида
Ўзбекистонлик ёш иқтисодчи Беҳзод Ҳошимов ва Ботир Кобиловлар АҚШ президенти сайловларини муҳокама қилди.
Uzbekonomics подкастида Ҳаррис ва Трампнинг сайловолди кампанияси, номзодларнинг дастурлари ҳамда иқтисодий платформалари ҳақида мулоҳаза юритди.
2024 йилдаги энг муҳим сиёсий ҳодиса бўлиб турган АҚШ сайловлари ҳақида ўзбек ижтимоий тармоқлари бу гал қарийб ёзмаётир. Ҳозирча расмий ва маҳаллий мустақил нашрлар қисқа ҳамда хронологик хабарлар билан чекланмоқда.