Республикачилар Конгресснинг юқори палатаси – Сенатда кўпчиликка эга бўлади
Оҳайо штатида Берни Моренонинг ғалабаси Республикачилар партиясига АҚШ Конгрессининг юқори палатаси – Сенатда кўпчиликка эга бўлишни нақд қилиб қўйди.
Автомобиллар савдоси билан шуғулланувчи тадбиркор Берни Морено Оҳайо штатидан уч муддат сенатор бўлган демократ Шеррод Браун устидан ғалаба қозонган.
Морено ғалабаси кўпчилик учун кутилмаган ҳодиса бўлди. Шеррод энг нуфузли қонун чиқарувчилардан бири бўлиб ҳисобланади. У Сенатдаги банклар ишлари бўйича қўмита раиси лавозимини эгаллаб келган.
Сайловда берилган овозлар тўлиқ санаб бўлингач, республикачилар билан демократлар ўртасида фарқ каттайиши мумкинлиги тахмин қилинмоқда. Ҳозирча яна олтита штатда овоз бериш натижалари чиқарилган эмас, бу штатларнинг учтасида республикачилар ғалаба қозониши эҳтимоли бор.
Ким ютиши мавҳум бўлиб турган штатларнинг биринчиси - Шимолий Каролинада Трамп ғалаба қозонди
Республикачилар номзоди Дональд Трамп овоз бериш натижаларига кўра Шимолий Каролина штатида ғалаба қозонган. Бу ҳақда Associated Press агентлиги ва New York Times нашри хабар қилди.
Шимолий Каролина АҚШдаги президент сайловида қатнашаётган номзодларнинг қайси бири ғалаба қозониши номаълум бўлиб турган етти штатнинг биридир.
Камала Ҳаррис эса Виржиния штатида ғалаба қозонган – бу штатда ҳам номзодлар изма-из келаётгани айтилганди.
Айни пайтга келиб Дональд Трамп 230 та овоз, Камала Ҳаррис эса 209 та овоз йиғишга муваффақ бўлгани айтилмоқда.
АҚШнинг ғарбий штатларида овоз бериш тугади
Ўрта ғарбий штатлар, жумладан Аризона, Висконсин, Мичиган каби муҳим штатларда овоз бериш участкалари ёпилди.
Бундан ташқари, Колорадо, Аёва, Канзас, Луизиана, Миннесота, Небраска, Ню-Мексико, Нью-Йорк, Шимолий Дакота, Жанубий Дакота, Техас ва Ваёмингда овоз бериш якунланди.
Ҳозирга қадар овоз бериш якунланган штатларнинг ҳеч бирида фавқулодда ёки кутилмаган натижа қайд этилмади - анаънавий тарзда демократларни қўллаганлар демократ, республикачиларни қўллаганлар республикачиларга овоз бермоқда.
Баъзи шарқий штатларда сайлов участкалари тонг соат 5:00 да очилди ва овоз бериш бутун мамлакат бўйлаб, шу жумладан, Аляска ва Гавайида, АҚШнинг узоқ ғарбий штатларида кечгача давом этади. Сайлов участкаси қачон ёпилишини ҳар бир юрисдикциянинг ўзи белгилайди.
