Киев вақти соат 17.00: Қурбонлар сони 51 нафар
24 февраль куни тонгда Владимир Путин Украинага қарши уруш очганини эълон қилди.
Шундан сўнг мамлакатнинг 25 шаҳрида, жумладан, Киев, Харков, Одесса, Краматорск, Бердянск шаҳарларида портлашлар бўлди.
Россия ҳарбийлари Украинанинг бешта вилоятига бостириб кирди.
Украина президенти Владимир Зеленский мамлакат ҳудудида ҳарбий ҳолат жорий қилди.
Украина Ички ишлар вазирлиги Россия ҳужуми оқибатида Киев вақти билан соат 17.00га қадар 51 киши ҳалок бўлганини ўнлаб одам яраланганини билдирди. Ҳалок бўлганларнинг 32 нафари тинч аҳоли вакили ва 15 нафари ҳарбийлардир.
Донецк вилоятининг Угледар шаҳрида россиялик ҳарбийлар отган снарядларнинг маҳаллий касалхонага тушиши оқибатида 4 киши ўлди, ўндан ортиқ одам ярадор бўлди. Ярадорлар орасида 6 нафар тиббиёт ходими ҳам бор.
Киев вилоятида Украинага қарашли ҳарбий транспорт самолёти қулаб тушди. Самолёт Жуково ва Триполте қишлоқлари оралиғидаги ҳудудга қулаган. Расмийлар самолёт бортида 14 киши бўлганини, улардан беш нафари ҳалок бўлганини билдирди.
ТИВ: Украинада 4300 га яқин Ўзбекистон фуқароси бор
Ўзбекистон Ташқи ишлар вазирлиги ҳозирда Украина ҳудудида 4300 га яқин Ўзбекистон фуқароси борлигини маълум қилди.
Айни пайтда, рўйхат шакллантирилаётгани айтилди.
Украинада юз бераётган воқеалар туфайли Вазирликка оммавий ахборот воситаларидан кўплаб саволлар келиб тушган. Саволларга Ташқи ишлар вазирлиги расмий вакили Ю.Қабулжонов жавоб берган.
Расмийга кўра, Украинада рўй бераётган воқеаларда Ўзбекистон фуқаролари орасида жабр кўрганлар қайд этилмаган.
"Ўзбекистон Республикасининг Киевдаги Элчихонаси томонидан эвакуация режаси ишлаб чиқилмоқда. Шу мақсадда, биринчи навбатда, қўшни давлатлар орқали жўнаб кетиш йўналишлари ва кейинги бориш манзиллари ўрганилмоқда", дея маълум қилди".
Черниговда рус разведка взводи таслим бўлди
Чернигов шаҳри яқинида Россия армиясининг 74-мотоўқчи разведка бригадаси таслим бўлди.
Бу ҳақда Украина бош қўмондони Валерий Залужний маълум қилди.
Расмий баёнотга кўра, бригада старшинаси Смоленск областининг Ельня шаҳрида ҳарбий машғулотда бўлгани ва Украинага ҳужум ҳақида кеча маълумот олганини айтган. Рус аскарлари, ҳужумни қилиб, ортга қайтамиз, деб ишонганини айтишган.
Россия ҳарбийлари Чернобиль АЭСини эгаллади
Бу ҳақда Украина Қуролли кучларининг қуруқликдаги қўшинлари қўмондони маслаҳатчиси Алена Шевцова хабар қилди.
"Россияликлар Чернобиль станциясини босиб олди. Станция таркиби гаровга олинди. Бу нафақат Украина, балки Европа учун ҳам жиддий хавфдир", деди Алена Шевцова.
Украина Ички ишлар вазири маслаҳатчиси Антон Герашенконинг айтишича, россиялик ҳарбийлар Беларус ҳудудидан Чернобиль АЭСи ҳудудига бостириб кирган.
"Радиоактив чиқиндиларни қўриқлаётган миллий гвардия аскарлари душман билан жангга кирди. Агар артиллерия ҳужуми оқибатида ядровий чиқиндилар кўмилган жойлар очилиб кетса. унинг чанги Украина, Беларусь ва ЕИ далавтларига ёпирилиши мумкин", деб ёзди Антон Герашенко.