Самарқандни миллий гвардиячилар "босди"
Самарқандда ШҲТ саммити ўтиши муносабати билан хавфсизлик чоралари мисли кўрилмаган даражада кучайтирилмоқда.
Озодлик суҳбатлашган маҳаллий аҳоли вакиллари шаҳарда жамоат тартибини сақлашга қўшни вилоятлардан Миллий гвардия ва Йўл-патруль хизмати ходимлари жалб этилганини айтишди.
“Вилоятлар Миллий гвардия машиналари шаҳарда кўпайган. Тошкент номери билан юрган Йўл-патруль хизмати машиналарини ҳам кўп учратяпмиз”, - дейди хавфсизлик сабаб исми очиқланмаслигини истаган самарқандлик фаол.
Самарқанддаги бинолар фасади безалмоқда
ШҲТ саммити арафасида Самарқандда биноларнинг ташқи кўриниши қайта реконструкция қилинмоқда.
Озодлик манбасининг айтишича, шаҳар марказидаги уйлар фасади пенопластдан ясалган декоратив безаклар билан бир хил қопланмоқда.
Самарқандда катта тадбир арафасида олиб борилаётган қурилиш ишларига қўшни вилоятлардан ишчилар ҳам сафарбар этилган.
“Мардикорларга тўланадиган кунлик иш ҳақи икки баравар ошиб, 200 минг сўмга етди. Ҳаммасига ишларни 11 сентябргача тугатиб, шаҳардан чиқиб кетиш буюрилган. Шунингдек, қўшни вилоятлардан гул экувчи аёллар ҳам олиб келинган. Аэропортдан шаҳар марказигача йўл четига гуллар экилмоқда. Гул экувчиларга 130 минг сўмдан шу ерни ўзида беряпти”, - дейди самарқандлик блогер Гулшода.
2019 йилда ШҲТ саммити муносабати билан Самарқанд шаҳрини ободонлаштириш ва янги қурилишларни амалга ошириш учун 25 миллион доллар ажратилган эди.
Саммит олдидан блогерлар огоҳлантирилмоқда
ШҲТ саммити арафасида маҳаллий блогерларга “салбий” ҳолатлар ҳақида ёзмай туриш тайинланган.
Самарқандлик блогер Темур Саттаров бу ҳақда Facebook саҳифасида ёзди.
“Бу тадбирлар давомида ҳеч қандай салбий нарсаларни нашр этмасликни "сўрашди". Мен тузумга қарши чиқмайман. У ҳали ҳам бор, мен оилам учун қурбон бўлмайман”, - деб ёзди блогер.
Аммо Темур Саттаров топшириқ қайси идорадан бўлганини очиқламаган.
Самарқандлик бошқа бир блогер Фарруҳ Самарқандий ҳам блогерларга босим бўлаётгани ҳақида гапиради.
“Менга ҳеч ким ҳеч нарса дегани йўқ, лекин Интернетга чиқиб ҳар- хил бўлмағур нарсаларни ёзманглар, деган нарсалар бўляпти. Ҳар-хил негатив чиқарманглар Интернетга, мана шу гаплар қайсидир ташкилотлар томонидан айтилаётганини Телеграм гуруҳларда, ўзимизни гуруҳлар бор, ўша ерда ёзишяпти. Кўплар ёзяпти, лекин шахсан ўзимга айтилгани йўқ”, - дейди Самарқандий.
ШҲТ саммити сабабли Самарқандга кириш ва ҳаракатланиш чекланади
Самарқанд Ички ишлар бошқармаси 14 сентябрдан 17 сентябргача шаҳарга кириш чекланишини билдирди ва Самарқандга келишни режалаштирганларга ўз ташрифларини бошқа кунга кўчиришни тавсия қилди.
Расман билдирилишича, бундай чора Самарқандда ўтказиладиган Шанхай ҳамкорлик ташкилоти саммити муносабати билан қўлланилмоқда.
Бундан ташқари шаҳардаги 16 та кўча ҳаракатланиш учун, жумладан, автомашиналар учун ҳам ёпилади. Бу кўчаларда истисно тариқасида фақат тез тиббий ёрдам ва фавқулодда вазиятлар бўлинмалари транспорт воситаларига ҳаракатланиш учун рухсат берилади. Транзит автомобиллар учун айланма йўллар ташкил этилади.