Самарқандда ШҲТнинг 22-саммити ўз ишини бошлади
Ўзбекистоннинг Самарқанд шаҳрида 16 сентябрь куни Шанхай ҳамкорлик ташкилотига аъзо давлат ва ҳукумат раҳбарларининг 22-саммити иш бошлади.
Самарқанддаги Конгресс марказида бошланган Давлат раҳбарлари кенгашининг тор доирадаги учрашувида илк сўзни мезбон президент Шавкат Мирзиёев олиб, мазкур саммитнинг тарихий воқеа эканини урғулади.
Ўзбекистон президентига кўра, бугунги саммит доирасида 40 дан ортиқ шартнома ва қарор имзоланади.
Шанхай ҳамкорлик ташкилоти саммитида иштирок этадиган давлат раҳбарларининг барчаси 15 сентябрь куни Самарқанд шаҳрига етиб келишди. Шу куни улар иштирокида қатор икки томонлама учрашувлар ўтказилди, ҳужжатлар имзоланди. Бу борада президент матбуот хизмати томонидан ёйинланган видеолардан бири будир:
Шундан сўнг саммит меҳмонлари бўлган давлат ва ҳукуматлар раҳбарлари томонидан “Буюк ипак йўли” халқаро туризм марказида дарахтлар экилган.
Оқшом пайти саммит меҳмонлари Самарқанддаги “Боқий шаҳар” мажмуасини зиёрат қилишган.
Кейин Самарқандга етиб келган лидерлар шарафига Ўзбекистон президенти номидан қабул маросими уюштирилиб, зиёфат берилган. Маросим сўнгида отилган мушаклар эса ШҲТ саммити бошланганининг даракчиси бўлган.
Си Цзиньпиннинг Самарқандга ташрифи доирасида Ўзбекистон билан ХХР ўртасида 15 та ҳужжат имзоланди
Ўзбекистон президенти Шавкат Мирзиёев билан Хитой Халқ Республикаси раиси Си Цзиньпиннинг 15 сентябрь куни Самарқандда бўлиб ўтган музокараларидан сўнг икки давлат раҳбари Қўшма баёнот имзолашган.
Президент матбуот хизмати маълумотига кўра, тадбир чоғида икки давлат ўртасида 15 та ҳужжат имзоланган:
– “Яшил” тараққиёт соҳасидаги инвестициявий ҳамкорлик тўғрисида меморандум;
– Рақамли иқтисодиёт соҳасидаги инвестициявий ҳамкорликни мустаҳкамлаш тўғрисида меморандум;
– Фойдали қазилмаларни ўзлаштириш соҳасидаги ҳамкорлик тўғрисида меморандум;
– Коррупциянинг олдини олиш ва унга қарши курашиш соҳасида ҳамкорлик тўғрисида меморандум;
– Қурилиш соҳасида ҳамкорлик тўғрисида меморандум;
– 2022-2025 йилларда маданий алмашинув дастури;
– Миллий ахборот агентликлари ўртасидаги ҳамкорлик тўғрисида битим;
– Самарқанд вилояти ва Шаньдун провинцияси ўртасида шериклик алоқаларини ўрнатиш тўғрисида битим;
– Тошкент вилояти ва Чунцин мегаполиси ўртасида шериклик алоқаларини ўрнатиш тўғрисида битим;
– Бухоро вилояти ва Юньнань провинцияси ўртасида шериклик алоқаларини ўрнатиш тўғрисида битим;
– Бухоро ва Куньмин шаҳарлари ўртасида шериклик алоқаларини ўрнатиш тўғрисида битим шулар жумласидандир.
Қайд этилишича, Ўзбекистон билан ХХР ўртасида савдо-иқтисодий ва инвестициявий ҳамкорликка доир умумий қиймати 15 миллиард долларлик келишувларга эришилган ва битимлар имзоланган.
Ҳужжатларни имзолаш тадбиридан сўнг Шавкат Мирзиёев Си Цзиньпинга “Олий Даражали Дўстлик” орденини тантанали равишда топширган.
Самарқандда 15-16 сентябрь кунлари бўлиб ўтадиган ШҲТ саммитида Озарбайжон-Арманистон ҳамда Тожикистон-Қирғизистон чегарасидаги можароларга ечим топиладими? Озодлик мухбири Сарвар Усмон бунга оид масалаларни ўзбекистонлик сиёсатшунос Камолиддин Раббимов билан муҳокама қилди.