Ўзбекистонда Қандим газни қайта ишлаш заводини қуриш лойиҳасида Россиянинг Лукойл ва Кореянинг Hyunday Engineering ширкатлари иштирок этади.
Ўзбекистон ҳукумати 8,1 миллиард куб метр газни қайта ишлаш қувватига эга иншоот ташқи инфратузилмаларига 108 миллион АҚШ доллари миқдорида сармоя ётқизилишини назарда тутувчи қарор қабул қилди.
Регнум агентлигининг Ўзбекистон ҳукуматидаги манбаларига таяниб хабар қилишича, 2016 йил охирига қадар “Ўзбекистон темир йўллари” давлат ширкати заводга элтувчи темир йўл линияларини қуриб битказиши режалаштирилмоқда. Умумий узунлиги 48,7 километрни ташкил этадиган темир йўлга 50 миллион доллар сарфланади. 2017 йил охиргача эса “Ўзбекэнерго” қиймати 58,8 миллион долларга тенг электр билан таъминлаш объектларини қуриб бериши айтилади хабарда.
Бунда Лукойл ва Hyunday Engineering компанияларининг лойиҳадаги иштироки қиймати хабарда келтирилмаган.
Ўтган йили пайдо бўлган хабарда заводни қуришни ўз ичига олувчи Қандим конларини ўзлаштириш лойиҳасининг умумий қиймати 2,66 миллиард долларга тенг экани айтилган эди.
Айни пайтда, Россиянинг Лукойл ширкати 21 январь куни сармоя дастурларини қисқартиришини маълум қилди. Жаҳон бозорида нефть ва газ нархининг тушиши ортидан қийин аҳволга тушиб қолганини тан олган Лукойл 2016 йил учун мўлжалланган 8,5 миллиард долларлик сармоя миқдорини 1,5 миллиард долларга камайтиришга мажбур эканини эълон қилди.
2015 йил ноябрида Лукойл Қўнғирот газ конларини ўзлаштириш лойҳаларидан воз кечишини эълон қилди.
Лукойл 2004 йилда Ўзбекистон ҳукумати билан имзоланган Маҳсулотни тақсимлаш келишуви доирасида Қандим-Шоди-Қўнғирот газ конларини ўзлаштириш лойиҳаларида иштирок этади.